又熱又濕嘅天氣，必定係BB嘅剋星，因為呢個時間，衆BB們最易出熱痱，攪到啲皮膚紅腫痕癢，所有B哥B姐一定忍唔住手去抓，嗰笪熱痱就愈嚟愈大，有時仲會嚴重到發炎流膿。

其實出熱痱嘅高危位置，就係身體最多汗腺嘅部位，兩邊臉脥、頸紋位、頸背，膀頭同皮膚皺摺較多嘅關節位，例如手肘同膝蓋背面，全因天氣又熱又焗，過多汗水蒸發唔到，令汗腺排泄唔順暢，又或者被阻塞所產生出嘅紅疹。通常係BB身上都會普遍會有熱痱，因為汗腺發育未健全，所以唔能夠有效調節體溫，加上BB皮膚極之幼嫩，抗菌力又弱，再用滿佈細菌嘅小指甲抓多兩抓，細菌就有機可乘係皮膚表面繁殖；熱痱有時會生到全身四圍都係，但絕對唔會有性命危險，不過成日見住啲小朋友好似周身唔自在，做父母個心梗會「赤赤痛」。

依家市面出售嘅消熱痱藥，多數含有兩種主要成份，就係止痕功能嘅Anti-itch agent 同埋抗組織胺Anti-histamine，功效只係止痕同消腫，都唔可以令汗腺排泄暢通，根本就治標唔治本，如果想徹底消除熱痱，可以用一個最簡單嘅方法，就係用熱毛巾敷喺出熱痱嘅地方，利用熱力疏通汗腺，熱痱就消失，每日用熱水浸濕毛巾，毛巾盡量熱一啲，以皮膚能能夠承受嘅溫度為上限，敷喺出熱痱嘅位置，毛巾涼咗就換新嘅熱毛巾，每次敷約十分鐘，隔三個鐘頭敷一次，通常敷三、四次就見效。

仲有其他方法減少熱痱滋生嘅機會，就係開大窗戶令室內通爽，避免長時間暴曬， 如無風入屋，適當開着約廿五度冷氣，要經常洗澡但切忌用強鹼性沖涼液，日常衣物最好柔軟寬身，多食屬於微涼性嘅冬瓜或者西瓜，少食辛辣食物，亦可以煲綠豆湯、菊花茶作為消暑飲料，都係有效減少熱痱嘅食療配方。